ရာသီစာ ကြက်သဟင်းရွက်၏ ဆေးဖက်ဝင်အစွမ်း

ကြက်သဟင်းပင်၏ ဆေးဖက်ဝင်မှု

ကြက်သဟင်းပင်၏ ဆေးဖက်ဝင်မှုများကို ကျန်းမာရေးဝန်ကြီးဌာနမှထုတ်ဝေသော လက်တွေ့ အသုံးချဆေးဖက်ဝင်အပင်များပေါင်းချုပ် စာအုပ်၌ အောက်ပါအတိုင်း ဖော်ပြထားပါသည်။

ပုံသဏ္ဍာန်
ပင်မတ် ချုံပင်မျိုး ဖြစ်ပါသည်။၁-၇ ပေအထိမြင့်သည်။အရွက်မှာ ရွက်လွှဲထွက်သည်။အရွက်မှာ ငှက်မွှေးရွက်ပေါင်း ဖြစ်သည်။အပွင့်မှာ သေးငယ်သည်။အရောင်မှာ လိမ္မော်ရောင်။ရိုးတံကပ်ပြီး အပွင့်ပွင့်သည်။အသီးမှာ ညှာတံမဲ့သည်။

ပေါက်ရောက်ပုံ

စားသုံးပင်အဖြစ် နေအိမ်ခြံဝင်း များတွင် စိုက်ပျိုးကြသည်။မြန်မာနိုင်ငံအနှံ့အပြားတွင် စိုက်ပျိုးကြသည်။ မရှော့ရွက်ပင်နှင့် မျိုးရင်းတူသောကြောင့် အပင်ပုံသဏ္ဍာန်လည်း ဆင်တူရိုးမှား ဖြစ်ပါသည်။

အသုံးပြုသည့် အစိတ်အပိုင်းမှာ အရွက်၊ အမြစ်။

အာနိသင်

အရွက်မှာ အေး၏။ချိုသော အရသာရှိ၏။လေလမ်းကို ဖြောင့်၍ ဝမ်းမီးကိုတောက်စေ၏။

ပိုးနား၊ အဆိပ်နာကို နိုင်၏။ကိုယ်ပူနာနှင့် သင့်၏။အသည်းရောဂါများနှင့် အထူးသင့်လျော်၏။

အသုံးပြုပုံ

ကြက်သဟင်းရွက်အား ဟင်းချိုချက်၍ လည်းကောင်း၊ ကြော်ချက်စားခြင်းအတို့အမြှုပ်အဖြစ် လည်းကောင်း ဟင်းလျာများတွင် စားသုံးကြသည် ။

ကြက်သဟင်းမြစ်ကို သွေးသောက်ခြင်း၊ပြုတ်သောက်ခြင်းဖြင့် သွေးတိုးကိုကျစေပါသည်။

နှလုံးတုန်၊ ရင်တုန်ခြင်း ကိုသက်သာစေပါသည်။

အဆိပ်ရှိသော ပိုးမွှားများ ကိုက်ခံရပါက ကြက်သဟင်းမြစ်ကို သွေးလိမ်းနိုင်ပါသည်။

ကြက်သဟင်းမြစ်ကို ဆန်ဆေးရည်နှင့် သွေးလိမ်းပါက ကြပ်သမာနှင့် အဖုအကျိတ်၊အနာပေါက်ရောဂါ များကို သက်သာပျောက်ကင်းစေသည်။

ကြက်သဟင်းအရွက်ကို ဟင်းခါးချက်သောက်၍ လည်းကောင်း သုံးပုံတစ်ပုံကြွင်းပြုတ်သောက်ခြင်းအားဖြင့် လည်းကောင်း အဖျားရောဂါကို သက်သာစေပါသည်။အဖျားကျစေပါသည်။

ကြက်သဟင်း ပဉ္စငါးပါးကို သုံးပုံတစ်ပုံကြွင်း ကျန်အောင် ပြုတ်သောက်ခြင်းဖြင့် အသည်းရောင် အသားဝါရောဂါကို သက်သာစေပါသည်။ကြက်သဟင်းရွက် ဟင်းချိုအဖြစ်လည်း စားသုံးနိုင်ပါသည်။

ရှုတော်မူဆေးအဘိဓာန်၌ ဖော်ပြထားသည်မှာ အောက်ပါအတိုင်းဖြစ်ပါသည်။ကြက်သဟင်းရွက်သည် ပူ၏။ချိုသော အရသာရှိ၏။ဝမ်းမီးကို ဖြောင့်စေတတ်၏။ပိုးနား၊အဆိပ်နာ တို့ကို နိုင်၏။

ကိုယ်ပူနာနှင့်သင့်၏။အထူးသဖြင့် ၎င်းအမြစ်ကိုလက်တဆစ်ဖြတ်၍ ဆန်ဆေးရည်နှင့် သွေးပြီး ကြက်သမာနာကို သုတ်လူးလျှင် သက်သာပျောက်ကင်းစေတတ်၏။ သွေးကို ကြေစေတတ်၏။

မြွေဆိပ်ကင်းဆိပ် စသော အဆိပ်အမျိုးမျိုးတို့ကို လျင်မြန်စွာ ပယ်နိုင်၏။

ပါဝင်သော ဓါတုဓာတ်များ

အပင်တွင်ပါဝင်သော ဓာတုဗေဒဓာတ်ပစ္စည်းများနှင့် ဆေးဝါးအဖြစ် အသုံးပြုနိုင်မှုကို ဓာတ်ခွဲစမ်းသပ်ခဲ့ပါသည်။

ကြက်သဟင်းပင်၏ အရွက်၊ပင်စည်၊အမြစ်တို့ိတွင် အလွန်အစွမ်းထက်သော အောက်ပါဓာတ်ပစ္စည်းများ ပါဝင်၏။

Lignans,glycosides,Fluorides,Ellagitannins,Phenylpropanoids,Ar Abinogalactan.

ကြက်သဟင်းကို လက်တွေ့စမ်းသပ်သုတေသနပြုမှုများ

၁။ ဆီးလမ်းကြောင်းတွင် ကျောက်တည်ခြင်းကို စမ်းသပ်ချက်

ဆီးလမ်းကြောင်းတွင် ကျောက်တည်မှုအဖြစ်များဆုံးသည် ကယ်စီယမ်အောက်ဆီလိတ်ကျောက်တည်ခြင်း ဖြစ်သည်။

ဆီးလမ်းကြောင်းအတွင်းတွင် အမျိုးအစားမတူ ကွဲပြားသော ကျောက်တည်မှုများ ရှိနိုင်ပါသည်။

ဆီးအတွင်း ကျောက်များ အစိုင်အခဲ ဖြစ်ပေါ်မှုသည် ဓာတ်ဆားအမျိုးမျိုး ဖွဲ့စည်းမှုကြောင့်ဖြစ်၏။

ကြက်သဟင်းဖြင့် ဆီးအိမ်ထဲ၌ ကယ်စီယမ် အောက်ဆီလိတ် ကျောက်များရှိသော ကြွက်များကို စမ်းသပ်ခဲ့ပါသည်။

ကြက်သဟင်း အဆီအနှစ် ၅ မီလီဂရမ် ကို ၃၀ရက် တိုက်ကျွေးခဲ့ရာ ကြီးသော ကျောက်များသေးငယ်၍ သေးသောကျောက်များ ပျော်ကျစေကြောင်း ၂၀၀၆ ခုနှစ်တွင် ဘရာဇီး နိုင်ငံ၌ စမ်းသပ်ခဲ့ခြင်း ဖြစ်သည်။

ကြက်သဟင်းပင်ကို ဆေးဖက်ဝင်အပင်အဖြစ်အသုံးပြုနိုင်မှု

၁။ ကျောက်ကပ်ကျောက်နှင့်် သည်းခြေကျောက်ကို ပျော်ကျစေခြင်း၊ကျောက်များထပ်မတည်ရန် ကာကွယ်ခြင်း(expels stones)

၂။ ကျောက်ကပ်လုပ်ငန်း လုပ်ဆောင်မှုကို ကူညီလုပ်ဆောင်ပေးခြင်း၊ ကျောက်ကပ်ကို အဆိပ်အတောက်မဖြစ်စေရန် ကာကွယ်၍ ကျောက်ကပ်လုပ်မှု အရည်အချင်းကောင်းမွန်စေခြင်း၊ခန္ဓာကိုယ်အတွင်း အရည်များမျှတစေခြင်းသန်မာမှုရှိစေခြင်း(supports kidneys)

၃။ ဆီးရွှင်စေခြင်း၊ယူရစ်အက်စစ်ကို လျော့နည်းစေနိုင်သည့်ပြင် ဆီး ပိုသွားစေ၏။

၄။ ကိုက်ခဲနာကျင်မှု ပျောက်စေခြင်း

၅။ အသည်းကို အဆိပ်အတောက်ဖြစ်ခြင်းကာကွယ်၍ အသည်းသန် မာစေခြင်း၊အရည်များအချိုးမျှတခြင်း၊အရည်အသွေး ကောင်းမွန်ခြင်း(အသည်းအင်ဇိုင်း ဇီဝဓာတ်ကူပစ္စည်းများ မျှတမှုဖြစ်စေခြင်း )

၆။ အသည်းကို အဆိပ်အတောက်ပြေစေခြင်း

၇။ တောင့်တင်းခြင်း၊တက်ခြင်း လျော့နည်းစေခြင်း

၈။ ရောင်ရမ်းခြင်းကို လျော့နည်းစေခြင်း

၉။ ဗိုင်းရပိုးများဖြစ်သော အသည်းရောင်အသားဝါ အေ၊ဘီ၊စီ ရေယုန်ရောဂါနှင့် ခုခံအားကျဆင်းမှု။ဗိုင်းရပ်စ်ပိုးများကို သေစေခြင်း

၁၀။ အစာကြေခြင်း

၁၁။ သွေးထဲတွင် သကြားဓာတ်လျော့စေခြင်း

၁၂။ သွေးဖိအားလျော့စေခြင်း၊သွေးတိုး ကိုလက်စထရောလျော့စေခြင်း

၁၃။ ဗက်တီးရီးယားပိုးများကို သေစေခြင်း။

သုတေသနပြုမှုအရ အထောက်အထားပြည့်စုံသော အသုံးပြုနိုင်မှုများ

၁။နာကျင်ကိုက်ခဲမှုပျောက်စေခြင်း ။

၂။ဗက်တီးရီးယားရောဂါပိုးဆန့်ကျင်ခြင်း ။

၃။အသည်းအဆိပ်အတောက်ဖြစ်မှု ဆန့်ကျင်ခြင်း။

၄။အနာဖြစ်မှု ဆန့်ကျင်ခြင်း။

၅။ကျောက်ကကပ်ကျောက်တည်မှု ဆန့်ကျင်ခြင်း။

၆။ဌက်ဖျားကာကွယ်ခြင်း။

၇။အသည်းကလာပ်စည်း ဆဲလ် များကိုကာကွယ်ခြင်း။

၈။ရောဂါပိုးဆန့်ကျင်ခြင်း ။

၉။ဆီးသွားစေခြင်း ။

၁၀။အားတိုးဆေး၊အသည်းအားတိုးဆေး၊အစာကြေဆေး၊အသည်းကာကွယ်ခြင်းသန်မာစေခြင်း၊သွေးတိုးရောဂါ၊ကိုလက်စထရောကျစေခြင်း ။

ကမ္ဘာတဝန်း ကြက်သဟင်းကို အသုံးပြုမှုများမှာအောက်ပါအတိုင်းဖြစ်ပါသည်။

၁။ဂျပန်-ကြက်သဟင်းအခြေ ာက်ပဉ္စငါးပါးကို ပြုတ်သောက်လျှင် အထွေထွေကျန်းမာရေး ကောင်းသည်ဟု ယူဆပါသည်။

အသည်းရောဂါကို ဒိန်ချဉ်ရည်ဖြင့်ရောသောက်ပြီး အစာမကြေ၊လေနာ၊ဝမ်းကိုက်ရောဂါတို့ကို ရေနွေးကြမ်းအဖြစ်သောက်သုံး၏။အရွက်အစိမ်းအညှစ်ရည်ကို ကြက်ဆူဆီဖြင့်ရောစပ်၍ မျက်စိရောဂါအတွက် မျက်စိပတ်ဝန်းကျင်တါင် လိမ်းကျံသည်

၂။ပြင်သစ်-အရွက်ကိုပြုတ်သောက်လျှင် သည်းခြေရည်များစေခြင်း၊အသည်းအားတိုးဆေးအဖြစ်သုံး၏။

၃။အိန္ဒိယ-အရွက်စိမ်းရည်ကို ဆီးလမ်းကြောင်းရောဂါများ၊ဆီးချိုရောဂါများအတွက်အသုံးပြု၍ အရွက်ခြောက်ကို ရေနွေးကြမ်းကဲ့သို့သွေးတိုးရောဂါများအတွက်သော်လည်းကောင်း သောက်သုံး၏။

၄။ဖိလစ်ပိုင်-မီးဖွားပြီး အမျိုးသမီး များ အရွက်ပြုတ်ရည်ကို ရေချိုးခြင်းဖြင့် အရေပြားပေါ်ရှိ ရောဂါပိုးမွှားများ ကုန်စင်စေသည်ဟု ယုံကြည်သည်။

၅။ထိုင်းနိုင်ငံ-အဖျားကျဆေး၊ဆီးဆေး၊ဌက်ဖျားဆေး၊အထွေထွေရောဂါကာကွယ်ဆေးအဖြစ်သုံး၏။

၆။အနောက်အိန္ဒိယ-အစားစားလိုသောစိတ်ဖြစ်ပေါ်ဆေး၊ဆီးချိုရောဂါ၊ဆီးရောဂါဌက်ဖျားရောဂါဆေးများအဖြစ် အသုံးပြု၏။ဂနို၊ညောင်းကျရောဂါများပျောက်ကင်းရန်အသုံးပြု၏။

သူရဇ္ဇမဂ္ဂဇင်း ၂၀၁၃ ခုနှစ်။မေလ အတွဲ(၁၃) အမှတ်(၅)စွမ်းထက်နောင်ရေးသားသော ကြက်သဟင်းနှင့်အသည်းရောင်ရောဂါမှကောက်နုတ်ဖော်ပြချက်

Aung Myo Naing